我羅拉真係諗極都唔明，點解日本人可以拍爛手掌睇啲十二、三歲妹妹仔影嘅水着寫真，但就覺得唔夠二十歲未成年嘅青少年食煙飲酒係十惡不赦。
最近就有本雜誌大數圈中邊個純情女星係酒鬼，真係估唔到啱啱過咗二十歲冇耐嘅深田恭子都榜上有名，而一早預咗有份嘅，就有水着系嘅MEGUMI，同純情破產嘅安倍麻美。
恭子向來冇乜周圍wet嘅紀錄，但雜誌就話恭子其實係啤酒水桶，一手揸住杯啤酒就會係咁灌，唔通恭子肚上嘅babyfat其實係啤酒肚？有一個日劇工作人員爆料話：「佢一飲醉咗就會有啲奇怪舉動，會突然間狂奔，一係就匿埋唔見人。」
水着系方面，MEGUMI鍾意飲白酒同啤酒，至於阿媽開酒吧嘅仲根霞就會用枝豆、芝士同凍豆腐送酒，因為佢知道空肚飲酒傷身喎！
至於俾人影到去居酒屋隊酒嘅安倍麻美，雖然佢未成年，但係公開認咗錯就算啦，不過乖乖女形象就肯定冇晒。