產銷汽車零部件的北泰（2339），上市咁耐經紀黃就讚咁耐，噚日北泰公布中期業績，盈利大升，但經紀黃居然唱反調，話有錢賺可以獲利離場，未有貨者暫時觀望。
北泰噚日公布中期業績，盈利上升33%，有成8290萬元人民幣，但股價卻倒跌3.57%，收2.70。
原本小初以為係炒家趁好消息出貨，但經紀黃話唔係，佢覺得家陣北泰股價已經升咗好多，當日隻股受到追捧，主要係因為夠平。
不過有芬佬話，以招股書預測明年3月全年盈利每股0.17元計，預測PE高達15倍，計落唔算平。
北泰業績亦反映邊際利潤下降，由雙位數字降至單位數字，重有近期鋼材價格升咗咁多，管理層又似乎搵唔到好方法來應付原材料價格上升的影響，所以雖然唔多捨得，經紀黃都考慮獲利離場。
另外，由於莎莎（178）上周公布業績靚，兼且管理層講到前景一片美好，所以有炒家重提卓悅控股（653），話可以跟勢短炒。
慕容小初