早兩個禮拜，喺波斯富街見到大班潮人聚集，其中一個貌似紅小生馬浚偉，另一個就似陶大宇，正奇怪點解佢哋着得咁後生落銅鑼灣蒲？莫非為TVB新劇拍外景？望真啲貌似馬浚偉嗰個原來係浪漫設計自由人E，而似陶大宇嗰個就係原宿「左輪」揸FIT人A，佢兩個都係時下有創意又有熱誠嘅後生仔，所以非常老友。原來佢哋正一齊參與波斯富街地庫神秘舖頭「將軍」同原宿牌子「左輪」合作計劃，嗰日有不少日本原裝正宗「左輪」產品以日本原價賣，重有特別版TEE推出，搞到唔少原宿Fans排隊入閘執筍貨。聽講今次最好反應係件特別版Tee，白色嗰款已經係限量版，點知失驚無神又整款黑色出嚟，屬於超限量隱藏版，相等於KUBRICK1比96隱藏咁矜貴，如果擁有的話就發達喇！當日連日本仔都去排隊掃貨，氣氛唔錯。袁仁祥話最近零售巿道氣氛確實好轉，睇嚟街舖業主又蠢蠢欲動想加租，祥哥話係時候要另作打算。