恒指承接美股跌勢下挫137點，收報12177，其實冇乜特別，比較矚目係和黃（013）又再被拋售，大跌4%，收報53.50元，成交高達13億元。市場對和黃3G業務的憂慮似乎唔係咁簡單，唔通市場真係以和黃向KPN回購英國3G合營股權的超低作價，來衡量和黃整體3G業務的價值？和黃早前宣布以9000萬鎊收購KPN的英國3G股權15%，作價只係和黃投3G牌時的一折。
中國人壽（2628）噚日招股，好多阿伯阿嬸排隊輪候表格及招股書，孖展客亦開始入票，不過今次借孖展認購利率貴咗，長城汽車（2333）孖展息率係2%，但今次認購國壽就提高至2-3%不等，有個別證券行重高達4-5%，部份證券行怕俾客人鬧坐地起價，索性借爆後就唔再借。
長城汽車噚日截止認購，有傳聞話超購逾500倍，凍結資金736億元，要到下周一上市，資金才能解凍回流，國壽周四截止認購，兩股拍住上，資金市場當然混亂，紫金（2899）申請押後上市，似乎唔想同國壽硬撼。
世城系異動，世紀城市（355）大升21%至0.058元，成交1484萬元；富豪（078）升13.6%至0.15元；百利保（617）升3.9%至0.107元。黑客話，現時股市同樓市暢旺，來港旅遊人數趨升，唔少大行調高香港經濟增長預測，今次復甦唔係小陽春，只要樓市持續向上，世城系唔難擺脫困局，富豪再出售酒店資產，價錢都靚啲啦。
阿 虎