中環皇后像廣場豎起一棵聖誕樹，係旅遊發展局嘅傑作，呢棵樹成十二層樓咁高，十二噸重，燈飾輝煌，確係值得睇吓。之不過呢棵唔係真樹，並非來自俄勒岡州，而係人造樹，於是意見就多嘞，雪茄鄧（上海灘灘主）投書《南華早報》，指旅發局冇taste，破壞聖誕，但一般人覺得冇乜唔妥，幾靚吖。
左丁山放工後，特登行去睇吓。如果係真樹，當然更有氣氛，但去搵一棵百一呎高嘅杉樹做聖誕樹，恐怕「地球之友」、「綠色和平」會出嚟大聲反對啫。人造樹嘅成本應該較為便宜，唔會破壞自然樹林，左丁山認為可以收貨。搞氣氛啫，雪茄鄧咁認真，可能因為佢嘅文化修養極高，同我哋啲小民有距離。
天星碼頭隧道布置成許願廊，大家可以攞張心意卡（免費派送），寫上心願，掛在許願廊兩旁牆上，有啲情侶特登走嚟，男士抱住女士條腰，舉高女士去掛心意卡，都幾浪漫。不過人如潮湧，心意卡太多嘞，旅發局啲工作人員會隨時視乎情況，清除舊卡，情況好似新年去黃大仙裝香，三枝香一插落去香爐，工作人士就執起。不過天星許願廊啲工作人員就唔會執得咁快。
今年經濟喺下半年反彈，遠勝上半年，因此人心向好，公司亦有心機裝置燈飾，成個中環入夜之後，皇后像廣場一帶有啲睇頭，聖誕夜大家去完尖東去中環，全家一樂也。