12月又係時候諗定聖誕禮物，而SonyEricsson就一次過推出三部新機應市，高、中、低檔都有，不論聖誕開P定送畀男、女朋友都咁啱！
記者：劉耀祥 攝影：梁細權
T630嘅水貨T628到咗都係一個禮拜度，行貨話咁快就做野，T630比前作T610由黑炭頭變身白色殼，襯番晒聖誕節嘅白色氣氛。內置30萬像素相機，去睇燈飾就可以大派用場，影完又可Send畀朋友，分享聖誕喜悅。
的的骰骰嘅Z200，外形夠晒Trendy，女仔睇見肯定愛不釋手，而且行貨隨機有3個殼送，夾埋本身就有4個殼任你換，就算聖誕節一晚走幾場都可以場場換新衫。外形搶鏡之外，具有4,096色彩芒加40和弦鈴聲，睇EMS、打機都一流。
走低價入門機嘅T230，最啱用嚟聖誕抽獎或送畀屋企人做聖誕禮物。四平八穩嘅外形，同T610有幾分類似，十字掣操控性相當出色。功能方面亦都齊料，4,096色彩芒加32和弦，聲量夠晒大聲，放喺袋都聽得到。而且可以外加影相鏡頭，想影相就話咁易。
