Fans餓咗咁耐，對啱啱推出嘅《GT4：Prologue》反應梗係大啦，據Game舖回報，銷情相當不俗，好多機迷都係一心想盡早適應新嘅物理演算引擎，操熟手車等明年《GT4》正式推出，喺香港嘅尖沙嘴賽道一顯身手。不過據可靠情報，喺嚟緊12月24日開鑼嘅亞洲遊戲展（AGS），「GT之父」山內一典先生不但會親臨香港同Fans見面，重帶埋玩得嘅尖沙嘴賽道金碟嚟㖭，真係意外嘅驚喜。雖然暫定尖沙嘴賽道未必會公開畀入場人士試玩，不過《蘋果》正跟日本方面洽談，畀讀者優先試玩，詳情暫時要賣吓關子，總之昅實「爆機狂迷」就包冇走雞。
記者：徐影龍