由美國年輕人電台KIIS舉辦嘅「2003JingleBall聖誕晚會」，前日喺洛杉磯舉行，𠵱家美國最紅嘅女歌手，前晚個個都有畀面出席，好耐冇現身嘅籮霸珍妮花洛庇絲（JenniferLopez）重撈埋司儀嗰瓣㖭！不過當晚壓軸嘅BritneySpears，着住件鑲滿閃石嘅bratop現身，又大玩SM蒙眼，最搶鏡都算係佢囉！
其實前晚表演嘉賓多不勝數，除咗籮霸同Britney之外，BeyonceKnowles、KellyClarkson、HilaryDuff、Thalia同JessicaSimpson都有份表演。早兩日先俾男友班亞弗力（BenAffleck）大爆性史嘅籮霸，當晚一身性感晚裝出場，講身材真係唔會輸蝕，相反以性感見稱嘅Beyonce，淨係着住件恤衫出嚟，重俾人笑佢唔記得着褲㖭。
以在場fans嘅反應嚟計，Britney嘅歌迷似乎最多，不過據講當晚每位歌手都表演成六、七首歌，Britney只係唱咗三首就算，搞到歌迷好吊癮，賴死唔肯走，場面差啲失控！唉，Britney當晚表演期間成日蒙住隻眼，梗係睇唔到啦！