自從香港人七一大遊行，本地土共及親中馬仔，因為眾怒難犯，為免變為過街老鼠，封嘴潛水，玩咗一輪鱷魚式低調遊戲。
點知，最近人大四大惡人就二○○七年直選特首，揸住碌龍頭枴杖出聲反擊，土共就即時收到，有如秋風初起，三蛇出動，星期日嘅城市論壇，就變為土共大反撲嘅養蛇場，個個禮拜梗有爆笑言論，娛樂公眾。
上星期日，王敏剛啱啱叫特首，要委任區議員嚟代表嗰五成半冇投票者，噚日，又輪到資深女土共劉佩瓊登場，佢話：香港人心智未成熟，選民行為不理性，唔可以咁快普選特首？
香港人心智未成熟？咁中國政府點解要喺一九九七年收回香港，又叫心智未成熟嘅香港人「高度自治」？點解喺英中兩國誤判香港前途時，中方提出「港人治港」，劉佩瓊唔向英中兩國申訴；港人心智未成熟，一係就繼續由英國領導落去，一係就由中央人民政府直接派員來統治？
又或者，董建華亦係香港人，劉佩瓊亦係暗示緊，只有阿董一個人嘅心智成熟，其他六百萬人都好幼稚？不過，劉佩瓊如果係咁嘅意思，即是間接侮辱阿董，因為連曾慶紅私底下都評論阿董：此人辦事能力不高。阿董呢個香港人嘅智商，都係同劉佩瓊嘅身高差唔多，即是話，大家都好「Q版武大郎」。六年敗港，咁先至谷到港人忍無可忍，五十萬人大遊行，強烈要求阿董保外就醫。
香港人心智未成熟？五十萬人遊行，秩序井然，連誠哥都話示威咁和平，係香港人嘅驕傲。淨係呢樣，香港人嘅心智，就成熟過一九六七年搞大暴動、到處放炸彈炸番香港人嘅土共。劉女士講出咁高智嘅說話，證明佢唔係香港人，或者係日本人都唔定。
連捉鱷魚，本地老左都話：鬼佬捉唔掂，不如北上請祖國捉鱷魚專家落嚟捉，捉得到，就可以加強香港人嘅民族自豪感。咁嘅心智，又唔知成唔成熟？結果，鬼佬做不到的，祖國嘅鱷魚釗亦做唔到，捉鱷失敗，宣布長駐──嘩，鱷魚釗都好精啫，佢一長駐，就駐足七年，八方嘅民族尊嚴，大受創傷之餘，一諗：鱷魚釗咁咪又可以領綜援福利，又可以做埋香港永久居民？
（圖）劉佩瓊話香港人心智未成熟，咁佢係咪香港人呢？
傳真︰2623-9278
電郵︰