八方前晚去中大四十周年個大party，會展新翼見到好多出名校友，昨日寫咗幾筆，今日再補多兩句。話說呢個party有兩個笑位，一個係金耀基校長致辭時學楊利偉講太空講普通話；另一係許冠文棟篤笑。
許冠文以四十年變遷為經，政治傳媒時裝歌詞減肥等等為緯，透視社會由講邏輯到只求啱feel，笑到大家噴飯。例如佢話香港人好大壓力，但亦好識減壓，好似佢太太，就乜都賴晒佢，減肥唔成功，就話佢好唔㩒住啲大閘蟹，等佢食咁多隻。至於六百萬港人，有乜衰就賴晒老董，乜都係老董衰。不過最衰係阿董走先聽唔到吖。
許冠文重話五十萬人上街，都係靠feel，因為大家都唔明23條係乜，佢即場問邊個明？點知話口未完，台下有人舉起兩隻手，話佢好明，你估係邊個？原來係前保安局嘅甜糖湯顯明，呢位校友係葉劉嘅愛將，佢當日力推23條，當然唔可以咁快失憶啦。
老董除咗得到許冠文同情，重喺晚宴上出奇地受歡迎，成晚不停有人排隊同佢握手拍照留念，睇怕佢都老懷大慰。
傳真︰2623-9278
電郵︰