近年，法國標緻車廠先後推出多款新車，如206及307等等，全都備受車迷追捧；然而，廠方又於日前宣布推出全新407車系，以求爭取更高市場佔有率。
與推出多年嘅406車系一樣，全新標緻407同樣以中型豪華房車形象示人，並利用圓渾流暢嘅車身線條，襯以低斜頭燈及闊大鬼面罩組合，從而予人一份濃厚嘅新鮮感；然而，大幅面尾燈亦見鋪排清晰易讀呢！
至於車廂布局方面，由於車長達4676mm，而軸距則為2725mm，加上達1445mm嘅車高，因而能營造出一個較現行406車系來得闊落嘅車廂空間，匹配前後兩排承托力甚豐嘅高級真皮座椅，乘坐舒適性之高叫人對其留有深刻印象；除此之外，車內又有齊各項設備，如高級音響及原廠冷氣等等，既方便又易用。
廠方為顧及不同用家嘅需要，特別為新車安排有多個機械配搭供選擇，當中包括2.0公升（140匹）、2.2公升（162匹）及3.0公升（217匹）等型號；同時，廠方又為新車裝配上一套高性能制動系統，並有多套電子系統輔助，從而予人收放自如之感。有興趣嘅朋友，就要密切留意新車嘅到港日期喇！