《南華早報》執行總編輯劉志權辭職，理由不詳，但太古坊一帶嘅老友就聽聞《南華早報》會有大動作，高層嘅老闆級人馬，可能鬆人，自動讓賢，等大老闆郭鶴年親自操刀。搞政治，外國經常有內閣總辭呢回事，全部部長自動辭職，等總理有更大自由度去安排新人事，《南早》雖不至此，但郭大老闆御駕親征，下屬梗係要識做啦。
督印人（Publisher）ThaddeusT.Beczak以前做金融界，能幹兼醒目到不得了，聽聞已空出張櫈，由大老闆發落。督印人一般管行政、廣告、印刷，唔理編輯採訪，一旦離開嘅話，相信對《南早》嘅編採影響不大。不過咯喎，督印人與總編輯同是打工仔，分工清楚，問題不大，大老闆坐鎮喺度，關係就不同咯喂，中文報界對此甚有經驗，知得一清二楚。
辦報紙，有時係唔啱集團式經營嘅，最好由獨立財團家族主管，某啲家族，最大嘅財產就係一張報紙，管理意志力集中，唔需要瞻前顧後，患得患失。大集團就唔同嘞，生意太多瓣，幾十樣項目可以賺錢，報紙如果係其中一項，都唔會佔集團盈利好大嘅比率，但係報紙言論就可以為集團惹上麻煩，編輯唔生性，得罪各方人等之時，集團大老闆好容易會收到電話問候關懷，甚至影響其他項目嘅生意。與其如此，不如嚟一招「策略性轉移」（StrategicShift），一了百了啦。