美國就業數據續有改善，但未及市場預期得咁靚，美股借勢調整，杜指上周五跌68點，港股今日恐怕會低開。不過，港股上周連跌4日後，調整已近尾聲，恒指如能守穩12200水平，升浪隨時再起，吼低買Call輪，此其時也。
博大市反彈或升浪再展，買恒指Call輪最簡單直接。目前掛牌恒指輪有好多件，令人眼花撩亂，真係要畀心機篩選。總之，溢價太高者唔揀；太價內以致槓桿率太低者唔吼；太價外而不切實際者唔要；流通量低買賣難者唔玩。揸住呢幾個準則去篩選，剩番落嚟嘅對象應該唔會太多。
目前較好嘅對象係9220、9230同9237，3件都係明年4月29日屆滿，溢價由4.4%至7.3%，槓桿率11.7倍至19.9倍，行使價由11800至12600點。咁嘅數據，輪價對恒指變化會相當敏感，幾好炒。
唔想玩恒指輪，可以諗吓新地（016）嘅Call輪。地產股近期企番穩，大市若回升，地產股應該有份。新地10日線剛升破20日線，技術初步轉好，Call輪9118可以小注怡情，現價58仙，明年5月到期，溢價8.5%，槓桿率有11.1倍。
章 盛