呢排城中熱話係明年邊個會出嚟參加立法會選舉，雖然鄺其志自己否認會去馬，但係傳聞並未止於「智者」，重話陳方安生在背後施展「玉女心經」，用隻玉手頂住神童背脊，吐氣如蘭，全力支持。八方前晚咁啱見到陳四萬同佢夫君陳棣榮，於是向陳太求證。
陳太展開佢招牌嘅笑容，話如果鄺神童或者其他舊同事參選，佢一定捧場，因為班細路始終比較熟悉政府運作，而且重好後生，大有可為。鄺其志有咁堅嘅支持者，應該再考慮。至於陳太自己同埋手袋黨成員鐵蝴蝶任關佩英，佢就猛咁耍手兼擰頭話唔會再出山，橫掂佢同陳生目前弄孫為樂，好happy；而鐵蝴蝶亦冇同佢講過話要選立法會。
雖然到目前為止，冇人肯認會上戰場，不過話有前高官參選嘅消息人士重係言之鑿鑿叫八方去尋寶，所謂兵不厭詐，不如一齊數吓，除咗陳太、鄺神童、任關之外，退咗嘅官場中人重有許仕仁、周德熙、楊啟彥、曾一哥、張敏儀、藍鴻震、梁世華，如果陳太肯孭正飛，簡直可以成立一個影子政府，同大陸講數，二○○七年普選特首㖭。
（圖）陳太同夫君陳棣榮目前弄孫為樂，話唔會選立會喎！
傳真︰2623-9278
電郵︰