好多地產股股價近排都回升唔少，就連早排批完股後大散的新世界發展（017），股價都升回批股價樓上。
呢件事啟發小初，話唔定老虎仔隻遠東發展（035）有得諗。經紀黃亦有同感，話遠展可以短炒業績。
遠展年中由唔夠0.30元，炒到上去最高1.33元，跟住就以每股1.20元配股集資，之後股價就在1元水平浮浮沉沉，當升穿1.10元時就會有沽盤質番落去，但跌穿1元時又有人頂番上去，似乎係有隻無形之手睇住。
經紀黃話，遠展將在12月17日公布中期業績，如無意外，應該會因賣樓收益而令盈利上升，加上年尾流流，斷估接咗貨嘅芬佬都會做吓櫥窗粉飾，令到股價好睇啲，有所交代。
遠展上周五升3.85%，收1.08元，成交股數有2190萬股，金額2226.8萬元。
另外，紡織股冠華國際（539）今日公布中期業績。經紀黃話，傳聞業績表現唔錯，可以留意，或者有短炒機會。
慕容小初