爆機狂迷：<br>PS2版《ZGundam》賣大包四大勢力網上決戰

爆機狂迷：
PS2版《ZGundam》賣大包四大勢力網上決戰

不論街機版或家用版，《GundamDX：聯邦VS自護》都獲得空前成功，除長青樹高達嘅號召力外，擅長動作遊戲嘅CAPCOM參與製作，亦直接令遊戲趣味性增加不少。到續篇《ZGundam：奧干VS泰坦》依然精采，PS2版更加入前作嘅聯邦軍及自護公國，四大新舊勢力共冶一爐，登場機體不計其數，重支援Online對戰，Fans肯定過足癮。

記者：嘉美尤

由於《ZGundam：奧干VS泰坦》（下簡ZGundam）入面，兩軍都出現不少可作變形嘅機體，故此新加嘅變形系統可算係新作一大變更點，機體不單可像往時跳躍移動及攻擊，亦可變身飛行形態，作迅速及較遠嘅移動。不過要注意一點，埋身格鬥威力似乎縮減不少，從飛行狀態再作格鬥突擊變得不容易，較為平衡到飛行機體嘅優勢。而飛行形態一樣限制於Booster嘅數值，最好保留少許Booster，待落地作閃避敵方攻擊之用，避免因着地硬直而受襲。



新舊機體共冶一爐
PS2版《ZGundam》另一特色就係加入大量街機版未收錄嘅機體，以圍繞「一年戰爭」嘅《GundamDX》聯邦軍及自護公國為主，再加街機版《ZGundam》嘅奧干及泰坦斯軍，所有機體通通有份登場，包括元祖高達RX-78、太空坦克、紅勇士等，四路勢力打餐飽，相當之熱鬧精采，換句說話講，舊版高達跟高達MK-II甚至超級高達將有機會同場較量，令人期待。

■HC爆氣系統擁有多項進攻優點，主要靠跟隊員合作而提升。

■HC爆氣系統擁有多項進攻優點，主要靠跟隊員合作而提升。

■跟前作一樣，出場前可選擇武器種類，如激光槍、大炮等。

■高達MK-II可跟G防衞者結合，成為超級高達。

■好多街機版嘅隱藏機體，喺PS2版上都可即時使用。

■有唔少《GundamDX》中嘅機體登場。

湊齊腳網上開戰
《ZGundam》最成功之處，莫過於最多可作2對2方式四人齊打，極為講究戰略部署同合作性，雖然移植到PS2後縮到得番雙打，不過卻設有Online功能，可透過日本MMBB伺服器作網上連線對戰，雖然大部份機迷對MMBB嘅寬頻伺服器速度感滿意，不過遇着用56K上網嘅玩家，成Team人將被大幅拖慢。
較有趣係MMBB伺服器設有某程度進入限制，如超過100場戰鬥、300場戰鬥等，將戰鬥經驗相若嘅機迷集中一齊，令到初哥同高手都有自己嘅戰鬥空間。

■遊戲中團隊精神十分重要，獨行俠好易俾敵人圍抽。

高達熱潮停不了
繼雪白PS2快將登場後，連《ZGundam》都不甘示弱，推出代表「百式」嘅黃金PS2套裝，一機兩手掣全部金色，雖然娘到爆，不過網上預訂已升至港幣$3,100嘅炒價，重有《ZGundam》8MB記憶卡連盒，及嚟緊嘅火紅色馬專用版GAMECUBE同GBASP，全部預訂名額一出即滿，睇嚟BANDAI呢棵高達搖錢樹重可以長搵長有。

■8MB記憶卡連盒，行貨將到唔使捱炒價。

■百式黃金PS2套裝，未出街已炒至三千幾蚊港紙。