港股自10月14日升越12000大關，至今已有8個星期，上周五恒指收12314，比10月10日收市11935，上升379，8個星期計數，分別係「升跌升升跌跌升跌」，恒指高低位分別為12月2日的12539同11月21日的11661，基本上係橫行整固之局，雖然調整幅度未夠，但時間可說已足夠，因此，大市升浪隨時會再現，再創出今年新高，而升勢更有可能持續到明年第一季。
國企指數期貨今日登場，芬佬早已部署，準備大舉炒作，預計未來一兩個月，國企股表現會好波動，但大趨勢仍係向上，投資者可短炒，亦可中線持有，獲利幅度會幾可觀。至於大市，預計滙豐（005）會再發力，成為下一個升浪的火車頭，目標可見135元至140元，而恒指上升目標則如早前所估計，會去到13500至14000。
港股升咗咁多，竟然唔肯調整，理由其實好簡單，就係太多錢入市，而且來勢重係好急。芬佬對後市睇得好好，佢哋話，以現時資金流入個勢來衡量，明年第一季個市會升得好犀利，雖然恒指預計升幅只有十多個巴仙，但個別股票就會升幾成，甚至以倍計。
除國企外，二三線股中，亦有唔少寶藏，好似彩星集團（635）、佑威（627）、恒豐金業（870），以及上周五突然有一手1000萬股上板（成1.04元）的遠東發展（035），都係有實力而預期未來升幅會幾大的股票。
遠展的走勢已顯示股價有力大升，佢近日突破自9月開始形成的大型三角形，𠵱家做緊後抽，升破1.1元就大升浪出現，中期上升目標指向2.0元。
至於遠展業績，亦可向股價提供足夠的上升動力。遠展係3月結算，04年度的中期，成績表好快派發（去年係12月20日），03年度的中期同全年業績，分別係賺755萬元同蝕1.31億元，現年度業績肯定靚好多，中期估計增幾倍，全年肯定轉盈，賺幾多？保守估計1.8億元，亦即每股賺0.16元，PE不足7倍。下年度，盈利可大增到4.8億元，每股賺0.43元，PE就算6倍，股價已可見2.6元。
今年8月，遠展股價由0.3元升上1.3元，係第一春，今次再破位而上，可出現第二春，照度上去，最少升1元。
郭兆誠