樓價雖然回升，但市場仍有唔少低價住宅成交，好似屯門居屋兆軒苑，最近就有個A座低層一室，以二十五萬二千蚊，喺第二市場成咗，以面積五百八十六方呎計，呎價只係四百三十蚊，價錢同出售公屋差唔多，但質素應該好啲。咁嘅價錢，只係貴過深圳布吉同埋珠海新樓少少。
自由市場方面都有平價貨，同區居屋兆康苑N座高層一室，五百四十一方呎，成交價四十四萬五千蚊，呎價八百二十三元，同深圳一線新樓售價水位差距唔遠。
講開平價單位，忠誠拍賣行上個月就造咗兩個銀主盤，係屯門私樓龍珠島別墅F6座地下同三樓，面積同係二百八十六方呎，成交價二十五萬二千同二十七萬，呎價都唔使一千蚊。個盤係舊樓，重係冇𨋢嗰隻。
將軍澳蔚藍灣畔嘅明星買家愈來愈多，蘭西噚日就撞正都市閒情節目主持之一嘅傅劍虹，喺售樓處簽約，佢同屋企人買咗個一座中層千一呎單位，三百幾萬元，貪個盤近無綫電視將軍澳廠房，比𠵱家住緊兼打算放盤嘅鴨脷洲海怡半島方便得多。另外，發展商證實，歌星鄭嘉穎早排都買咗同座六百五十幾呎嘅兩房單位，樓價約二百零萬，至於市傳阿姐汪明荃同佘詩曼分別洽購，發展商點都唔肯講，淨係話呢個準買家好忙，唔係成日得閒。
地產經紀努力搵錢之餘，都有善心爆棚嘅一面，中原大埔分區經理鄧振豪就係代表，佢9月份佣金收入非常理想，公司額外醒咗一萬銀獎金畀佢，而佢就將全數金額捐咗去奧比斯眼科飛機醫院，最近奧比斯路過香港，其發展董事PaulForrest重親自接收支票㖭。鄧振豪話，一點心意可以畀更多孩子有機會重見光明，絕對值得。
今個聖誕大埔超級城，選擇以意大利水都威尼斯概念做主題，布置除以傳統聖誕節裝飾外，重放咗兩個巨型傳統意大利面具做背景，又喺聖誕樹上掛滿面具。商場節目有意大利面具舞蹈表演、威尼斯特技人吞火表演，噚日出席開幕表演嘅名模嘉賓歐陽妙芝、楊崢、樂基兒，就穿上威尼斯宮廷服飾catwalk，全場洋溢意大利情懷。
今年沙士爆發，令到好多行業元氣大傷，下半年喺京港政府聯手力托之下，至有番啲起色。據測量界講，今年生意額比舊年普遍跌咗一成幾，已算還得神落。同行多數喺服務質素方面加碼，鬥平搶客唔算嚴重。
由於業界都感受到下半年市道好轉，預期明年會好過今年，所以各測量行都唔立亂裁員，以免接到大量工作時，唔夠人手，錯失搵錢機會。
蘭西
電郵地址：