湯盈盈同佢位圈外大隻男友拍拖兩年，生活非常甜蜜蜜。上個月底佢哋俾人影到喺銅鑼灣宜家睇家具，日前湯盈盈又同男友去時代廣場買鞋，之後佢男友重幫佢拎住對鞋繼續掃貨，表現好細心。
嗰晚七點幾，湯盈盈戴住副黑超，着到成個女黑俠咁，同着住短袖T恤嘅大隻男友去時代廣場二樓一間鞋店。其間湯盈盈試咗幾款女裝鞋，佢男友就坐埋一邊，笑笑口咁睇住女朋友喺鏡前左照右照，顯得好有耐性。最後湯盈盈買咗一對皮鞋，跟住就同男友繼續喺商場掃貨。
湯盈盈喺劇集中成日做狐狸精角色，對住男人放電，估唔到私底下對住男朋友，佢就由頭包到落腳，而且十足小鳥依人嘅小女人。
組合2R噚日喺尖沙嘴出席防火活動時，自爆喺澳洲讀書時Rosanne曾因為煲湯唔記得熄火，搞到成間屋都熏黑晒，最後要自掏幾千蚊澳幣裝修番間屋㖭。而2R近日積極排舞，不過一講到有冇打觔斗呢啲高難度動作，佢哋就有意無意暗寸初出道時嘅Twins話：「唔係打觔斗先係高難度，我哋都跳到腰痠背痛啦。」
梁漢文前晚喺沙田出席商台亮燈晚會，講到正東、環球兩間唱片公司合併，梁漢文話：「我諗影響唔大，一定唔夠華星嗰時亂。」問佢此舉會唔會影響好友許志安，要同李克勤爭做「一哥」時，梁漢文話：「唔使爭，可以有兩個『一哥』。」
蒙嘉慧噚日喺旺角出席一個綿羊仔活動，重帶埋自己架綿羊仔到場，問佢多唔多去兜風，佢話：「都係夜晚揸吓去食飯。」問佢有冇試過揸車時俾人撩？佢話：「都有嘅，但都係善意，最多係見到我會讓吓我囉。」蒙嘉慧咁靚女，馮仁昭見到你都讓啦！
容祖兒最近做麥當勞嘅薯條調味粉「香烤蜜糖味ShakeShake粉」代言人，因懷疑含有致癌嘅甜菊糖，麥當勞前日已停售。祖兒噚晚喺無綫將軍澳電視廣播城，對呢件事回應話：「我都有食過，但𠵱家麥記都收番晒，佢哋會研究另一種味道，不過食薯條唔落呢啲粉都好好味。」祖兒咁講算唔算倒米呢？
