金像女星姬妮芙柏露（GwynethPaltrow）自從宣布有咗後，大前日上去JayLeno度接受訪問晒幸福。噚日姬妮芙又俾美國傳媒踢爆，指佢同Coldplay主音男友ChrisMartin已經入紙加州婚姻註冊署排期結婚，準備喺周末完婚。
姬妮芙同ChrisMartin呢單未婚懷孕嘅新聞，我羅拉日日好似睇連續劇一樣，據噚日美國嘅《EntertainmentTonight》報道，現時正喺加州度假嘅姬妮芙同男友，前日朝早已經去咗加州聖達芭芭拉婚姻註冊署申請結婚，換句話講，佢兩個只要再一齊去聖達芭芭拉婚姻註冊署簽個名，就可以成為合法夫妻。據知姬妮芙好想速戰速決，所以會喺香港時間今日凌晨簽紙。
有說ChrisMartin咁唔小心搞大姬妮芙個肚，感到非常之唔好意思，所以今次佢哋齊齊去加州，最大原因係Chris想三口六面同姬妮芙個演員媽咪貝芙丹娜（BlytheDanner）提親。Chris重想等伯母應承之後，齊齊去婚姻註冊署，估唔到自命傳統保守嘅姬妮芙，講到結婚竟然會咁兒戲。另外，英國噚日又有消息話KylieMinogue有喜，不過Kylie有喜嘅消息已經傳過N次。