嚟到年尾，大家又會開始期待月底同年頭嘅假期，
如果唔想排隊過關、等上飛機，又想享受吓旅遊Feel，
找個本地度假營歎番晚如何？查實香港的營宿有唔少，
而且各有特色。想睇靚景又得，打高爾夫球又可以，
或者同另一半睇星星也夠浪漫，總之實有一個可以滿足你嘅需要。
記者、攝影：陳震霖
模特兒：Yoee
會員半價玩
賽馬會西貢戶外訓練營，背山面海，重有其他豐富設施畀你慢慢玩。3月31日前，入會成為青協會員，參加協會旗下機構的入營活動，更加可以半價參加營內各種活動，只要你或者係你嘅子女，年齡介乎6至35歲之間，就可以申請成為會員，免入會費㗎！
嘩！有個靚爆海景，一起身就可以衝出露台，然後盡情咁伸個懶腰。唔擦乾淨隻眼，一定重以為自己發緊夢，由城市搬咗去海邊生活。講真，對住咁無敵嘅270度海景，真係覺都唔想瞓，由朝到晚對住個海，睇一世都唔夠喉。
呢度嘅別墅總共有14棟，分別設有2人、8人及12人單位，間間都咁整潔舒服，又設獨立浴室同洗手間，拍得住度假酒店！玩完出面多元化嘅活動之後，返嚟坐喺落地玻璃旁休息吓，疲倦一下子就消失晒啦。
營地前係一片紅樹林濕地，呢度孕育咗唔少海洋生物，熱心嘅導師會帶大家實地考察。既可以度假，又可以認識自然生態，一次過滿足兩個願望。
賽馬會西貢戶外訓練營
地址：西貢大網仔道DD256地段
交通：由彩虹邨巴士站乘92號巴士往西貢巴士總站（$5.5），再轉乘94號巴士直達營地（$5.5）。
電話：27922727
網址：
營費：日營每位$20；宿營$400（2人）至$1,200（12人）
青年協會入會查詢：28319183
隨時入營
以前去宿營，閒閒哋都要預先三四個月預訂先至有位，如果旺季，可能重要成大半年預訂。不過，𠵱家去北潭涌度假營，只要你有張身份證，就可以隨時冠冕堂皇咁即時訂營，真係啱晒我哋呢啲喜歡即興嘅香港人。
講到呢個營嘅最正活動，肯定係打Golf。如果之前未玩過，一落場唔識打又驚無面，不如大家嚟呢度練習吓先。呢度設有發球區同推球區練習場，玩其中一樣又得，兩樣玩晒又可以。不過兩樣都咁好玩，計我話玩一樣又點夠呢？
保良局北潭涌度假營
地址：西貢北潭涌保良局度假營
交通：由彩虹邨巴士站乘92號巴士往西貢巴士總站（$5.5），再轉乘94號巴士直達營地（$5.5）。
電話：27924302
網址：
營費：日營（星期六、日及公眾假期）每位$38，（平日）每位$25；宿營（周六晚及公眾假期前夕）$430（2人）至$1,104（8人）
北潭涌度假營25周年，2月28日舉行免費日營，到時除了可免費入營，更會即場派發Coupon，讓大家參與各種活動，不過Coupon有限額，想知詳情記住上網留意最新消息。
睇星星最強
雖然有天文望遠鏡的營舍不止一間，不過據白普理營嘅負責人講，佢哋支鏡堪稱全港營舍最強。兩年前Upgrade嘅16吋天文望遠鏡，設有自動星體追蹤系統，會跟住地球自轉而轉變觀賞角度。另外，更設11支小型望遠鏡。不如趁住今個月13至16日嘅雙子座流星雨，帶埋女朋友入營睇吓星星啦。
呢度啲房舍最多可以住20人，最少8人，紫色上蓋，加埋綠色嘅燈柱。遠睇埋去，真係好似童話故事裏面嘅屋仔。
嚟到白普理，又點可以唔玩呢度至激嘅空中飛人。要在離地約25呎跳台飛身跳出，雖然係有安全帶卡住，但喺少啲膽識都唔夠膽玩呀。
香港小童群益會白普理營
地址：新界西貢黃宜洲257地段642
交通：由彩虹村巴士站乘92號巴士往西貢巴士總站（$5.5），再轉乘94號巴士至北潭涌閘口之後第一個站（發記士多對面）下車（$5.5），經復興橋沿自然教育徑再步行約25分鐘即到達營地（沿途設有指示）。
電話：27921409
網址：
營費：日營（星期六、日及公眾假期）每位$19，（平日）每位$17；宿營（周六晚及公眾假期前夕）$584（8人）至$1,120（20人），（平日及星期日）$448（8人）至$880（20人）
1.白普理營
2.保良局北潭涌度假營
3.賽馬會西貢戶外訓練營營
