白韻琴昨晚出席一活動時，被問到劉鑾雄與王穎妤的恩怨時說：「我兩個都識，希望第日劉生出自傳時，搵我做寫手代寫，佢大紅燈籠高高掛，一定成為男士嘅偶像，佢嘅情史太精采、太豐富同太多啦。如果佢唔記得我會搵番，我做咗好多資料搜集。至於王小姐，佢係阿Paul（謝偉俊）嘅師妹，佢冰雪聰明、天衣無縫，好似《紅樓夢》嘅王熙鳳。」
問白姐姐覺得有人索二億元分手費是否太高？她說：「價值觀人人唔同，雙方同意咪OK囉。」再問她鄭裕彤表示不接受大劉道歉一事，她說：「就算父母兄弟都好，最親嘅人都會有誤會，會反枱，不過唔會耐嘅，一段時間就會冇事，因為朋友都係長遠嘅，有人做和事老好快就冇事。」問她有沒有意做和事老？白姐姐說：「我想呀，不過我唔夠份量咋。」
至於誰是幕後黑手？白姐姐說：「劉生老早講咗啦，搵彤叔幫手放蛇嘛，你哋有冇睇《無間道》？放蛇嘅功能係試探嗰個人知唔知件事，都講咗係佢上司，排除冇可能嘅，重有幾多人？又有財有勢，就係佢上司囉，連劉生都要畀面，有幾多個？有乜人咁親，親到連自己老友都唔撐去幫？意思即係父子緊過友情，我唔講邊個，總之資料畀晒大家啦，你哋都估唔到嘅，怪唔得彤叔嬲啦，之不過我都希望呢件事快啲完，佢哋都係有大智大慧嘅人，將來一定會一笑泯恩仇。」
採訪、攝影：林妙萍