劉德華同佢所屬嘅加際唱片不和到出晒面，但佢前晚都應公司安排，同一班加際新人去九龍灣展貿出席「Neway2003至稱心服務選舉發布會」，幫手帶新人做宣傳咁蝕底都肯制，鬼叫華仔俾張歌星合約綁住咩。
不過去到又點吖，華仔同加際唱片行政總裁伍曼英成晚冇碰頭又冇打招呼，十足十仇人咁，華仔喺台上講笑話：「我好支持啲人搞呢啲活動提拔新人，我個袋度有五十蚊可以贊助畀大家，十蚊硬幣都有好多，不過係假嘅。」華仔咁講唔知係咪想揶揄人哋嘅付出係假嘅呢？
據馮仁昭所知，華仔喺上次同加際新人做宣傳時，要錄《終極無間》主題曲而趕住走，當時唱片公司都知，所以近排加際伍小姐公開話唔知華仔錄咗音嘅可能性極低，不過佢一時話想華仔唱《終》片主題曲，一時又話華仔錄歌冇知會佢，一定唔會畀佢推出，搞到華仔向馮仁昭發晒火咁話：「叫佢唔好玩啦，呢啲說話要講都唔係𠵱家，兩個月前好講啦。」
此外，華仔噚日去咗台灣幫《終極無間》做宣傳，又同莫文蔚出席ChannelV記者會，認真忙碌。
其實馮仁昭最唔明係，點解華仔次次都同合作嘅人有糾紛，睇嚟華仔真係要帶眼識人呀。
曹敏莉噚日同戚黛黛出席無綫活動，佢哋兩個話每年都會同屋企人搞party過聖誕，而曹敏莉就話細個嗰時一直以為係聖誕老人將啲禮物放喺隻襪入面，直至有年讀書時至知啲禮物係爹哋媽咪送，而戚黛黛就話從未收過好特別嘅禮物，因為從未有過男朋友喎。真係唔知信唔信佢哋好呀！
蔡卓妍（阿Sa）同鍾欣桐（阿嬌）嚟緊要開演唱會，不過阿Sa日前病倒入院，佢一出院即刻趕去元朗拍埋《見習黑玫瑰》呢部戲，諗住之後專心做演唱會綵排。點知呢頭阿Sa康復開工，嗰頭輪到阿嬌感冒，你都咪話唔邪，馮仁昭奉勸啱啱好番嘅阿Sa，小心咪俾阿嬌傳染，如果兩個一齊病就大件事啦！
台灣第四十屆金馬獎今個星期六舉行，英國網上博彩公司開出盤口，到噚日為止，最熱嘅當然係港台都大受歡迎嘅《無間道》，「最佳導演」、「最佳男主角」、「最佳影片」同「最佳男配角」四項提名，賠率由1.2至1.65倍，其中「最佳男主角」，梁朝偉就以1.65倍領先劉德華嘅1.95倍，睇嚟都有得爭！
許志安同Cookies噚日喺尖沙嘴出席一個頒獎活動，安仔所屬嘅正東唱片同環球唱片合併，搞到本來係一哥嘅佢，𠵱家分分鐘要屈喺李克勤之下。不過安仔就話：「𠵱家重興有一哥咩？唔好話一山不能藏二虎，我睇電視見過兩隻老虎可以friend到互舔，我同克勤都互舔囉！我唔係一哥，喺樂壇只係粒塵咋！」
