特首董建華嘅民望向來如深海潛艇，愈潛愈低，不過香港遊樂場協會一項青少年調查顯示，董生喺「成功政治人物」榜中排首位，得票率罕有咁贏咗陳方安生同曾蔭權，唔通董生轉運？
八方諗咗好耐都唔明，但諗番轉頭，歷史上又有幾多個政治人物，可以成功令五十萬人喺烈日下自願出嚟遊行，令一百萬人出嚟投票「踢走」保皇黨，之後重可以保住個寶座而唔使下台呀？啲青少年選董生，真係好有見地。
個投票共有二千四百名青少年參加，董生得一百八十六票（7.75%），比第二位嘅陳方安生多十一票，比第三位嘅曾蔭權多四十三票；唐英年（四十八票）同葉劉淑儀（二十六票）分別排第四同第五。
陳太反抗「離間者」失敗而辭官，煲呔曾經俾人投閒置散都唔敢反抗，梗唔算得係成功政治人物；葉劉「衰23」後又冇學董生攞出勇氣留低，當然唔合格啦。
近三成受訪青少年話，成功人士首要係富有，其次係有影響力同高薪厚職，難怪多達一成六選李嘉誠做工商界成功人物，比第二位嘅何鴻燊同第三位李澤楷，多出成七個馬位。體育界成功人物本地首位係李麗珊，國際首位則係碧咸。
傳真︰2623-9278
電郵︰