橫跨三個年頭《無間道III：終極無間》上畫在即，頭兩集故事相信大家都想重溫過後，再上戲院睇第三集；寰亞今個星期好識做地推出了《無間道II》DVD版，好等大家好戲睇全套！據行內人稱，緊跟《無間道II》後，《終極無間》落畫一個月後，重有一套三集嘅BoxSet推出，果真是出碟無間！
記者、攝影：朱崇德
最新推出的DVD《無間道II》，可以話係《無間道》嘅前傳，主要係交代幾位主角人物，早在十年前所種下的種種恩怨情仇！基本主線人物都冇變，不過第一集嘅中軸人物劉健明（劉德華）同陳永仁（梁朝偉），就轉由陳冠希同余文樂分飾；講真！筆者就是為了這個選角問題，而在戲院上畫時罷睇！不過𠵱家睇番DVD版，感覺係好故事，加老戲骨勁鬥演技，同第一集嘅震撼力同壓迫感，絕對不遑多讓，絕對係今個星期最正DVD！
《無間道II》故事年代退返到《無間道》嘅十年前（1991年）；一夜之間，香港黑幫龍頭倪氏家族老教父遭殺害，兒子倪永孝（吳鎮宇）成為新教父，警察反黑組警探黃志誠（黃秋生）竟然牽涉入殺人事件中，從而帶出複雜人物的種種恩怨情仇，劇情由頭至尾鬥智鬥力。
一開場必睇黃志誠同韓琛（曾志偉）喺差館食飯對話一幕！格調同第一集有啲似，不過就大玩反《無間道》，黃志誠同韓琛竟然是一對可以同枱食飯好朋友，而且性格換轉，黃志誠係一個唔守法嘅差人，韓琛是一個「和氣生財」的二線蠱惑仔，點解十年後兩人的性格會有180度轉變，大家可以從故事中找到答案。
《無間道II》
價錢：$84 發行：寰亞電影 區碼：3區
電影中另一搶鏡人物係吳鎮宇，佢今次唔做飛機師轉行做新任黑幫龍頭；一句「出得嚟行，預咗要還！」，掀起黑道江湖腥風血雨；吳演技又見提升，淡淡的演繹手法扮演香港「黑幫教父」，嗰種令人捉摸唔透嘅感覺，的確增添了電影一種無形迫力！
最好睇是開場一幕，不現刀槍扳平尖東四大黑幫頭目；尾場擊槍殺韓琛，嗰種情仇攻心，殺與不殺兩不可，亦顯現精湛演技；全套戲基本由頭至尾，都係這三個中堅老戲骨鬥演技，加上好劇本，此片可算是近年港產片中的好戲。
今次《無間道II》，原來今次都學鬼佬片咁，大玩隱藏片段，大家只要去Disc2嘅主目錄，由「故事摘要」按右鍵，就會去到「InfernalAffairs2」，裏面收錄了Mary姐、黃秋生及儍強等的蝦碌片段。
陳冠希同余文樂電影中嘅戲份，真係冇劉德華同梁朝偉咁多，可能咁嘅關係，所以刪剪片段上「加重」番佢哋嘅戲份；陳在刪片中，大玩「偷槍玩死老差骨」，余就「黑獄跟大佬」，睇埋感覺會令故事更圓滿。
主題曲MV，可以話𠵱家DVD碟必收錄嘅Bonus，不過去番第一集嘅尾場天台拍，睇落都好有Feel。
1.無間道II
2.魔盜王：決戰鬼盜船
3.重案夢幻組II
4.盜墓者羅拉：生命之匙
5.魔戒二部曲：雙城奇謀
睇激烈槍戰場面
今個星期都可算係西片威晒，最好賣3區DVD中，5佔其4都係外語片，不過好彩第一位是《無間道II》，為港產片攞番個「頭」彩！劇本好、演員又撞出演技，係今個星期必煲DVD；另外值得推介嘅係《重案夢幻組II》，槍戰場面勁正，加埋5.1聲道嘅子彈橫飛感，感觀刺激一流；《魔盜王：決戰鬼盜船》就主力Sell特技，上星期就出咗1區，今個星期3區抵埗。
店舖：DVDPRO
電話：23326326
地址：旺角奶路臣街6E德發商場地庫B4舖