正當香港嘅富豪汽車新代理，引入以全新CitySUV設計概念示人嘅XC90抵港，並大收旺場後，那邊廂瑞典廠方又響日前舉行嘅某大國際性車展上，展出走年輕Sportwagon路線嘅全新V50，務求響市場上分一杯羹。
由於全新V50係針對一啲既年輕又富活力嘅用家，故此響外形設計上，廠方亦作出相應配合；圓渾有致嘅車身線條，惹人注目之餘，襯以與全新S40車系相近似嘅車首造型，與及同屬新設計嘅直立式尾燈鋪排，從而令車子倍添有一份教人難以抗拒嘅魅力。
乘坐舒適性能佳
至於車廂方面，與其他同級對手相近，新車都係以一個寬敞闊落嘅車廂作招徠，輔以承托力甚豐嘅座椅，不但能營造出一個舒適嘅乘車環境外，當遇有需要時更可將座椅收摺放平，以增加尾廂載物容量；設備配搭又見齊全，除常見嘅原廠冷氣及高級音響，另外重有全新嘅IntelligentDriverInformationSystem，以及KeylessDrive等系統，從而為你帶來不少方便。
與此同時，廠方又為用家提供有多個引擎配搭選擇，當中包括有兩台分別能輸出140匹及170匹嘅2435cc直5型號，而頂級版更會起用一台2521cc直5Turbo偈，馬力輸出高達220匹，匹配6前速手波或5前速Geartronic半自動波，表現同樣教人留有深刻印象。新車將於明年初正式推出，相信大家好快可與之見面呢！
