香港高爾夫球公開賽花絮

球迷識貨跟到足
噚日進行香港公開賽尾二回合，加上正值星期六，入場球迷明顯比早兩日多，而佢哋都好識貨，沿途跟隨前列一組球手如麥萊、積及遜行足十八洞；相反成績稍落後嘅中國球手張連偉，跟住佢嘅球迷就比早兩日少咗啲。

崔京周好受歡迎
打完第十八洞後，球手例必入記分室報分，好多球迷好識做，一早喺記分室門外等待球手索取簽名；噚日所見，南韓球手崔京周就大受歡迎，不論中外球迷都圍住佢攞簽名，呢位世界排名最高的亞洲球手果然不同凡響。

派宣傳產品受落
睇得高球賽通常都係高消費一族，不少香港公開賽嘅贊助商都把握機會，喺球場外宣傳產品，其中一間手提電話及家庭電話生產商就以美少女派發產品CD畀球迷，據聞反應都唔錯㖭。