今個星期PS2勁Game雙龍出海；《GT4：Prologue》加BANDAI搶番代理權嘅《ZGundam》，擺明要你糧頭使大錢，《GT4：Prologue》定價都係$198，加上遊戲內容全中文，點都值得支持。
而街機極Hit嘅《ZGundam》初出雖企硬4百蚊左右，不過反應極好，銷情對比上個星期真係以倍數增長。
懷舊名作《PC原人》由於賣$200有找亦有不少捧場客，KONAMI隻《矢吹丈：燃燒至灰白吧》反應算OK，市價約$390-420左右，據代理龍勇表示第一批貨已全數售完，矢吹丈Fans要買就快手。講開名氣，不得不提上星期NAMCO推出嘅《R.RacingEvolution》，前數集都有唔錯銷路，今集竟然賣得極差，市價落到$250左右，相信重會有排跌。
據Game舖消息稱，回歸PS2之作嘅《BIOHAZARD：OUTBREAK》有望星期尾搶閘推出，今集雖標榜可上網遊玩，但主線內容會係以70%Offline為主，冇上網亦有排玩，有興趣不妨星期尾去Game舖昅昅。
文：打機鐵人