7.1後民主派喺區選大勝，近來可謂氣勢如虹，特首董建華唔願軟化聽民意，又強硬不起來，喺政制改革呢一仗一直處於捱打狀態，阿董同香港嘅土共無力反擊，竟然要出動「四大護法」還招，呢班內地法律專家前兩日透過新華社連夜發稿，警告港人自決特首選舉方式等同「港獨」。
原來整個放料過程非常「有組織」，實際上嘅出稿時間係周四晚十點幾，如果報館真係咁夜先知有呢篇稿，好大機會已經冇晒靚位登，但本港多間報館都係有人提早通水，叫佢哋留定版位，有好嘢遲啲到，有報館更係由內地某負責港澳事務嘅部門直接電郵份稿落嚟。
八方八到幕後黑手來自北方，至於篇文點解搞到咁遲先出到，其實不難理解，內地呢啲涉及意識形態嘅文章，有所謂「三上三落」，即要經多重審批，最終由中宣部負責，所以搞耐咗一啲都唔奇，不過呢件事亦顯示內地高人熟悉香港傳媒運作，唔知幾時佢哋先知港人最想嘅，其實係民主。
傳真︰2623-9278
電郵︰