長城汽車（2333）呢隻股票果然好似伏勝之前所預測咁，氣勢十足，除咗傳言話好多證券行響銀行攞唔到貸款之外，重搞到好多間派發「抽獎券」嘅銀行出現大量排隊黨，要勞煩銀行班姐姐仔出動，每人限派4張表格，雖然並未出現萬人空巷嘅場面，不過唔難令人諗起當日Tom仔（8011）上市時嘅盛況。
雖然早前有唔少行家都話隻長汽一定有得炒，為免落空，唔少散戶都嘗試落大飛去抽股；不過，據市場傳聞，話說隻股喺國際配售部份已經爆到七彩，所以唔係每個散戶都一定有一手。傳聞重話，百記要企硬，唔肯調太多國際配售部份落去公開認購度，所以喺貨源歸邊下，邊個抽到就邊個會有運行。
不過當伏勝睇番長汽嘅招股章程後，先知隻股係500股一手，即係話，即使好彩抽中咗，如果只係配到一手畀你，賺到嘅錢真係十分有限，情況同人保財險（2328）完全唔同。
有朋友就計過數，話如果用十零萬落飛抽8000股先派得500股嘅話，就算隻股升2蚊，所賺到嘅1千蚊，計番百分率，回報率都係得1個巴仙。喺過去兩個月，好多隻新股都唔止呢個回報啦，所以班行家老友就叫伏勝不如留番啲錢去買隻嘉新水泥（699）重好過。
雖然隻嘉新水泥已經喺上星期五截咗飛，不過各位可以今個星期五等隻新股上市時先至買。點解呢排有咁多隻咁出名嘅股唔揀，偏偏揀呢隻股呢？皆因隻股有中台概念。
水泥股係好多台灣芬佬嘅愛股，傳聞話隻股喺未上市之前，已經晨咁早俾人圍晒飛，所以市場上根本冇幾多散戶揸住喺手。再加埋隻股由台資證券行擔正旗手，自己人一定會照顧番自己人，因此隻股喺上市後嘅表現，未必會差過隻長城汽車同隻中國人壽（2628）。
如果各位重未落飛抽隻長汽嘅話，不妨留番啲錢嚟玩隻水泥重好。
伏勝