石修去年帶兒子陳宇琛（石仔）加入娛樂圈，但石修狠批兒子在劇集《當四葉草碰上劍尖時》講對白速度太快。而石仔自小已看父親的演出，更大讚父親在無綫劇《衝上雲霄》中演風流爹哋「唐璜」很突破。石修表示演此角，主要受兒子影響，他希望演技可以「年輕化」，帶給觀眾另類新鮮感。
現年五十六歲的石修，身形依然喼得甚弗，更散發陣陣男人味。他在無綫劇集《衝上雲霄》內飾演吳鎮宇的風流父親「唐璜」，行為鬼馬；現實生活中，石修卻是個敦厚而思想開通的父親，去年他提攜兒子陳宇琛加入無綫，兩父子齊在娛樂圈發展。
石仔與同劇演員李逸朗、李雨陽和黎諾懿等，憑着青春劇《當四葉草碰上劍尖時》，在無綫台慶獲得非戲劇組「本年度我最喜愛的拍檔」獎項，對新人來說，絕對是很大的鼓勵。
石修怎樣看兒子在《四葉草》中的演技？他說：「作為一個新人嚟講，我畀佢七十分。無疑佢喺最初幾集重未warmup到，但後來已經掌握到個角色性格。不過我嫌佢講對白太快，未控制到節奏。我成日講做藝人要有『聲、色、藝』，『聲』永遠行先，講話嘅語氣好緊要，樣貌即係『色』，係次一步，至於『藝』就係演技。」
石修大讚《四葉草》中黎諾懿的演技可以得到一百分。對於父親的評分，石仔很接受，他說：「我會畀自己差唔多分數，甚至會低十分㖭，我覺得自己啱啱合格，但我真係放咗好多心機去演。」
石仔由細到大都是父親的忠實擁躉，就算不在香港都會翻看錄影帶，更視父親為第一偶像，他說：「爹哋套套劇我都有捧場，我覺得佢嘅演技好出神入化，不過我細個好唔鍾意爹哋扮奸人。」石仔又大讚父親在《衝》劇內演風流又鬼馬的爹哋「唐璜」，他說：「呢次係爹哋嘅最大突破，佢絕對係大膽嘗試，我畀佢呢次演技有一百分。現實生活中，爹哋都同我有講有笑，但冇咁鬼馬。」
石修表示這樣演繹父親角色，主要是受石仔影響，他說：「有時自己嘅嘢唔係永遠啱晒，我同個仔相處，喺佢度聽番嚟嘅意見，就係年輕人嘅口味，所以我咪改變一吓做個具時代感嘅爹哋，將呢啲元素加入角色，估唔到會帶畀觀眾另一番新鮮感覺。」
兩父子不介意在螢幕上攜手合作，石仔說：「我抗拒扮父子，咁同現實生活冇分別。」石修卻建議：「不如扮仇人，又或者情敵，呢啲題材會特別啲，亦都可以考驗吓我哋嘅演技。」
撰文：比華利
攝影：林德雄
場地提供：富德拳館
髮型：ColinWong（Headquarters）
