本港電訊市場競爭激烈，電訊公司以各種手法爭取客戶，但售後服務及支援不足，客戶求助無門。本報近日接獲和記環球電訊固網電話網絡多位客戶投訴，家居電話網絡極不穩定，經常通話中途斷線，惟和記未有即時安排維修，以致一度沒有家居電話使用，對外聯繫中斷。
「佢哋唔知將我屋企條線駁咗去邊，要求維修，竟然話星期日冇人開工。」家住大埔的李先生為和記固網電話網絡用戶，日前其所住大廈有住客安裝和記固網電話，工程令李先生的家居電話「唔知駁咗去邊」。
「噚日我打電話返屋企，長響無人聽，還以為發生乜事，返到屋企至知原來個電話壞咗，打得出，打唔入。當日為星期六，致電和記客戶熱線要求維修，卻指要星期一才有人上門，李先生忍至星期一，但竟失約。」李先生多次向和記投訴又無人理會，轉向本報投訴。
居住鴨脷洲利東邨的周先生，十月中將家居電話轉用和記固網網絡，原定轉線當日，他「等足一日」和記都未能成功轉線，但他原來所用的網絡「準時截線」，致無電話可用，十分不便。
周先生說，「佢哋裝咗幾日都裝唔到，累我幾日冇電話用，又冇解釋」，好不容易才安裝妥當，不到一星期，電話又無端斷線，一氣之下，要求終止合約，但和記表示需繳付五百元毀約費，才可終止。
「佢哋服務咁差，又唔畀我停用，呢次整好又唔知幾時斷過，重好意思寄張單嚟叫我交三個月月費，咁嘅服務，唔知要忍到幾時！」
「屋企個電話無端端斷線，足足兩日至整好，回復短暫正常，又斷過，和記三次派人上門修理，都冇用，足足斷咗六日都解決唔到」。林先生氣憤的向本報投訴和記服務。
他說，其間有和記職員解釋，因他的電話線與其他住戶同用一條線，所以會出現「爭線」情況。「和記嘅服務咁唔穩定，點忍呀，斷線期間會唔會退番月費畀我？」林先生不滿因斷線而令對外聯絡受影響，「估唔到香港嘅電訊發展咁快，但佢嘅服務重可以咁落後。」
和記環球電訊公司跟進本報轉介投訴後覆稱，和記是向另一固網商租用最後線路，為客戶提供服務，因此技術人員在完成檢查工作後，須聯絡有關固網商跟進檢查，始發現三位客戶之個案均為機房線路問題，經維修後已回復正常。（一一二六○○一、一一二五○一五）
消費者委員會發言人表示，本年頭十個月，消委會已接獲超過一千二百宗有關固網電話服務的投訴，比去年全年接獲的多出超過一倍（數字見附表）。發言人表示，若固網電話營辦商提供服務，消費者有權取消合約，如有投訴，可致電消委會。
查詢熱線：29292222
消委會接投訴數字
2001年：221宗
2002年：546宗
2003年（1-10月）：1235宗
服務熱線
電話:29908288
傳真:23702192
電郵: