親愛的大衞：
好耐冇見啦！上次見你已經係你嘅球衣榮休儀式（就係左邊張相，順便寄埋俾你）。你近況如何？我就慘啦，今年冇咗你喺度睇住班「細嘅」，成班波即刻唔掂；我寫呢封信嘅時候，啱啱先畀湖人個死肥仔打贏我哋；今年已經係第三次喇！
上年你退休之後，我一心諗住搵我老死傑特過嚟幫手打天下，點知佢又話乜嘢情義兩難全，重要照顧馬田呢個火爆仔；結果𠵱家佢隊網隊打到不知所謂，我哋又冇咗個好keyman壓場，真係兩頭唔到岸。
冇咗傑特，惟有望柏加仔生生性性，點知佢重衰過上年；一攞波就發晒癲，剩識亂衝；一場先交嗰四個助攻，但失誤就成二點二個；假如你響度，肯定晚晚請佢食「籐條炆豬肉」。至於真路比利係幾好嘅，不過啲新兵又唔爭氣，連對魔術都要我攞成四十七分先贏到，唉……
講嚟講去，最衰都係湖人。上年俾我哋打殘後，今年四圍招兵買馬，連郵差同大口仔都擸埋，懶係「四條煙」喎；再睇番我哋請番嚟，頂你個位嘅尼斯達洛域成隻軟腳蟹咁，真係唔使打都知邊個贏啦！衰開有條路，上個禮拜對住快艇，我爭位唔小心「掂」到球證之嘛，點知又要罰停一場；黑到上心口呀！
其實你又使乜咁快退休呀，男人老狗唔好成日掛住湊仔先得㗎；橫掂佐敦唔打又打都搞幾年，不如你出番嚟，打冧多次湖人先退休喇。假如你肯就真係最好嘅聖誕禮物啦！弟 鄧肯上
（仙道彬代筆）
電郵：