兩個盛蛋杯＝雙鈴？
衫架＋木筷子＝三角鐵？
未正式開始做樂器前，當非洲鼓及創作藝術導師的Channon哥哥，將以上物件一件件拿出來敲打示範，小朋友們個個都瞪大隻眼，驚奇地聽着講解。雖然有部份小朋友都識彈鋼琴又或小提琴，但就想不到，原來平日身邊的物件都可以製成好好玩嘅敲擊樂。最後佢哋重同Cypress姐姐嘅非洲鼓來個大合奏！
記者：吧吧啦 攝影：星辰哥哥
場地提供：M1128Studio
特別鳴謝：一雙手非洲鼓樂團
聽成身都着到好Yeah嘅Channon哥哥講，原來我哋身邊有好多物件都可以製成樂器，最常見係將空水樽加入沙或紅豆變成沙槌，又或者將用嚟裝洗衣粉嘅膠桶做鼓，然後將木筷子又或發蛋器變作鼓棍等。另外，鐵衣架又可作為三角鐵，將兩個鐵製嘅盛蛋杯一起敲，就會成為聲音清脆響亮的雙響鈴。小朋友個個豎起耳仔留心聽，似乎對這些樂器都感到好奇！
小朋友起初還以為就這樣拿着原材料拍打，原來重要同佢哋改裝和粉飾一番。當分配好樂器的原材料之後，Channon哥哥同Cypress姐姐，就教呢班小朋友利用彩色膠紙、塑膠彩和布碎等，為這些原材料扮靚靚。
唔好睇小皓琳生得細細粒，全場做得最快就係佢。梗係喇，因為佢揀嘅係最細件嘅盛蛋杯，只需用黃色和綠色的膠紙慢慢捲，再用畫筆畫上圖案，叮一聲！你睇，幾咁簡單！
估唔到文靜嘅涴琳，原來有鬼馬的一面！只見佢十分認真地將「木樁」畫得七彩繽紛，還畫上俏皮嘅笑面，影相嘅時候又學佢畫嘅公仔，特登矇起對眼扮鬼扮馬！真係要頒個「至鬼馬」獎畀佢！
個個小朋友嘅作品都係獨自製作，唯獨依蕊嘅作品是和坐在一旁嘅媽咪合力完成。本來依蕊所揀選嘅洗衫板已經夠大件頭，再加上佢同媽媽合作以膠紙、布碎等材料，將塊洗衫板整靚靚，就成為聲音清脆特別嘅刮板樂器了。
唔好以為男仔一定係粗粗魯魯，其實佢哋嘅手工同對色調嘅觸覺，比女仔一啲都唔輸蝕！當中要數波波糖嘅作品最有創意，唔知係咪因為佢係巴士迷嘅關係，所以佢嘅作品都要同車有關，你哋覺唔覺得佢件樂器，驟眼睇有啲似路牌指示「不准進入」呢？
小意外
搞咗咁耐，小朋友終於完成自己嘅樂器喇！之後Cypress姐姐就用非洲鼓，教小朋友練習一些基本敲擊樂節奏，個個小朋友都聽得好留心。
活動資料
兒童「為您鼓舞．為香港鼓舞」活動
日期：2003年12月29日（星期一）
時間：上午10點至下午4點
地點：新界大埔紅林路2號大埔滘互動自然中心
費用：$360（包午餐）
活動內容：
．非洲鼓舞工作坊
．製作民族特色手工
．開心畫大花臉
．非洲鼓大合奏及表演
查詢電話：26714711