大劉昨日突然收火，在記者會上六、七次表示向彤哥（鄭裕彤）講「對唔住」，又表示求王穎妤放過自己，將來王穎妤有需要，能力範圍內自己會全力幫忙，更透露王小姐的「幕後老細」有勢力又有錢，並稱「當我買佢怕」。
大劉昨日接受記者訪問，除了多次向彤叔致歉外，更透露王穎妤的幕後老細有錢又有勢力，並表示希望事情從此告一段落。
（記者：記 劉鑾雄：劉）
劉：由頭到尾，我唔希望件事牽涉到彤哥在內，彤哥係我除咗屋企人之外最尊敬嘅人，無論我之前、現在或將來，講咗啲影響到佢老人家，引起佢不便嘅說話，我首先喺度向佢致萬二分嘅歉意，同埋講聲對唔住。我真係覺得好對佢唔住，我呢句說話如果有假就絕子絕孫。
記：你有冇同彤叔聯絡過？或者同王小姐聯絡過？
劉：冇，絕對冇。我冇同彤哥傾過，我今次同傳媒講好過同彤哥講啦，公開講對唔住好過靜靜雞講啦。
記：你話佢哋出咗追殺令，擔唔擔心人身安全？
劉：人身安全應該冇問題，咁又唔需要報警，呢個係人生經歷，吃咗虧咪吞落去咯。我從來冇主動公開討論過私人嘢，當我怕咗佢，怕咗佢嘅幕後勢力，因為牽涉好多人，我曾經考慮移民，或者今次件事會加速我移民嘅決定。
記：佢同幕後老細咁做，有乜嘢目的？
劉：一定唔係金錢上，因為佢（幕後老細）好有錢，但我唔想揭開佢嘅身份，我驚我講漏口連佢嘅名都講埋出嚟，咁就唔掂，今日當我買佢怕，我係被動，接受訪問嗰個唔係我，揭人私事嘅唔係我。為咗自己嘅利益，扮聖女貞德、觀世音菩薩託世唔緊要，但係唔好為咗自己，而建立喺人哋嘅痛苦之上。
我希望佢哋可以放我一條生路，我今日瞓醒之後，心入面嘅火落咗，嬲唔嬲都係兩個人嘅事，如果又牽涉到四角、六角，咁點搞？佢做嘢之前唔諗，同周刊電台做訪問，以為人哋會認同佢，好似我出嚟做訪問，亦唔會認為公眾、傳媒所有人都會認同。
記：財經界傳王小姐掌握咗一啲對你不利嘅證據？
劉：絕對冇，大家唔好咁諗，唔係我對某個女朋友好，係因為佢有我痛腳所以先買樓買首飾畀佢，呢啲只係完全幻想。
記：咁你驚唔驚佢有一啲資料，可能會令到你有刑事責任或者嚴重後果？
劉：我擔心呢啲嘢，咪要做縮頭烏龜？而且做人最緊要行得正企得正。
記：如果佢進一步，你會唔會將行動升級？
劉：我希望我嘅功力可以容忍，太離譜當然忍唔到，希望佢得些好意需回手，我預咗畀佢追殺，但係冇可能完全唔反抗乜都得。
記：咁你可唔可以舉個佢對你嘅追殺例子？
劉：我唔想愈講愈遠。好簡單，你有冇見過我喺蘭桂坊出現，走去講人啲嘢？佢就試過講過「邊個劉生？我唔識佢㗎」。我唔想搞大件事，唔係怕，因為我唔係心理變態，唔想有呢方面嘅享受。
記：你覺得呢場仗，你嘅勝算有幾多？
劉：一定冇勝算，我出嚟講嘢兩次，對我本人都有damage，始終有人會信我係求婚不遂所以咁，我又冇去維園城巿論壇辯論嘅經驗。咁佢有冇damage？我唔敢下判斷。
記：咁你覺唔覺佢會繼續追殺你？
劉：我希望佢忙到唔得閒理呢啲嘢，我希望佢事業一日千里，搵個好男友，嫁個好老公，我都唔想佢衰，我點會希望佢唔好而有快感呀。無論佢現時或以後，佢有乜嘢需要幫手，無論係金錢上抑或其他方面，雖然我只係smallpotato，我只要能力範圍做得到，我會盡量幫佢，如果佢識到個能力大過我嘅，咁梗係唔使啦！
記：咁嗰二億你會唔會幫？
劉：有日我嘅境界去到化境咁咪會咯。雖然我未去到信佛，但我愈來愈信因果，我求佢放過我，我哋嘅恩怨今日告一段落，算啦，根本唔值得，邊個愛邊個，究竟愛唔愛，都唔值得討論。
採訪：張止寒
