人人都走去抽新股，搞到股市悶到暈，連小初咁爛炒噚日都幾乎悶到瞓着。
好彩經紀陳殺到，推介一隻冷門創業板股中軟國際（8216），隻股今年6月以來幾乎未跌過，近日股價表現同成交都好勁，好似有料到。
經紀陳話，江湖傳聞中軟好似同雲南煙草簽咗一啲合約，所以有人借勢炒作都未定。
中軟喺今年6月，以0.32元招股上市，上市以來股價一直向上升，而公司業績亦唔差，上個月公布的9個月業績，盈利上升近7成。遠東科技（036）係中軟股東之一，但隻股向來都係由大陸客，尤其係一班上海幫睇住。
中軟噚日又升2.4%，收0.85元，係上市以來新高，成交亦唔算少，有成600萬股，金額503.6萬元。
雖然小初向來對創業板股份唔係好大興趣，但經紀陳叫到，點都會望多兩眼。
另外，經紀黃早排推介，話可以炒業績的北泰（2339），唔經唔覺已經升上2.80元，下周一公布中期業績，唔知會唔會有人趁好消息出貨？
慕容小初