認購新股活動如火如荼，令到港股交投明顯轉靜，成交縮到只得91億元，恒指就連續第4日下跌，收12314，跌27.9點，但期指較強，收12318，升17點，高水4點。
今次3隻新股，長城汽車（2333）、中國人壽（2628）同紫金礦業（2399）幾乎同期上市，由於撞期關係，估計起碼凍結逾千億元資金。新股搞到咁熱爆，主要係早輪上市嗰兩隻H股「好好肉」，申請者揸到𠵱家，真係賺到笑。先講隻中航科工（2357），上市價1.21元，噚日收1.71元，升41%；另一隻人保財險（2328）上市價1.8元，噚日收2.775元，升幅更達54%！
經紀行呢幾日人頭湧湧，都係為咗開戶口，申請新股。3隻新股中，國壽「晒士」最大，紫金最細，長汽就飲頭啖湯，下禮拜一截止。噚日同業界朋友傾開，據佢所知，有好幾間經紀行嘅申請額，每間都已經超額20倍以上，粗略一計，長汽嘅IPO，超額高達300至400倍，申請者可能得個玩字。
長汽以每股10.05元到13.4元定價，發售1.14億股，其中1成作IPO，今年盈利不少於5.12億元，預期PE9至13倍，若IPO超購100倍以上，回撥機制就會啟動，IPO同配售比例各半。
目前已可肯定回撥機制要啟動，IPO股數可增至5700萬股，但若超額300倍計，亦即申請股數達34.2億股，仍超額60倍，申請3萬股者，亦未必有500股分配。
長汽同國壽一路都好Hot，紫金則呢兩日股氣突然大旺，聽講已經有芬佬準備大炒呢隻全港首隻金礦股，消息就話紫金會比長汽同國壽重「好肉」。
紫金發售3.483億股H股上市，為公司擴大股本的27.5%，其中1成為IPO，上市價2.6元至3.3元，PE9.3倍至11.4倍，下周二（9日）至下周五（12日）公開招股，若超購100倍，回撥機制啟動，IPO比例增至50%。
紫金「晒士」細，金礦股有賣點，兼且國際金價造好，對紫金又有利，上市後股價升50%或甚至100%，市值都唔會太誇張，若在國壽同紫金之間選擇，揀後者可能會有更大收穫。
郭兆誠