通常好多女星一有身紀，都鍾意收埋自己，不過，啱啱宣布同樂隊Coldplay主音男友ChrisMartin搞出人命嘅姬妮芙柏露（GwynethPaltrow），前日就上咗美國名嘴JayLeno主持嘅清談節目，喺電視上展露已經微微隆起嘅肚，重將快做媽咪嘅喜悅掛喺塊面度。
我大口羅拉八到姬妮芙同男友Chris知道有喜之後非常開心，近日有人喺曼哈頓見過佢哋兩個人去一間診所照吓個BB，之後佢哋好恩愛咁行街。Chris又不時將個頭貼住姬妮芙個肚，聽吓個BB嘅心跳。有爆料人士話，姬妮芙唔似係一個鍾意做未婚媽咪嘅人，佢同Chris好有可能已經秘密結咗婚。
姬妮芙係咪真係已經同Chris結咗婚，我大口羅拉就唔係好清楚，不過呢個BB都算好腳頭，呢頭話有咗，嗰頭佢老竇隊樂隊Coldplay，就獲得格林美音樂獎「年度最佳唱片」同「最佳錄影帶」兩個提名。
另外，《不日成名》靚女姬蒂韓遜（KateHudson）下個月就可以生得，有消息話佢個肚入面嗰個係女仔嚟。