民建聯沙田區大佬劉江華喺區選遇滑鐵盧，敗喺民主黨何淑萍手下，真係親者痛仇者快，支聯會成員黎麗霞噚日喺沙田區掛咗十條「熱烈慶祝」劉江華落選嘅橫額（圖）。
黎麗霞係民主黨立法會議員涂謹申助理，但佢強調今次「純粹個人恩怨，唔關任何黨派之爭嘅事」，之後就講咗劉江華由乙明邨一個互委會秘書到成為立法會議員嘅「向左走」之路。話說劉江華八十年代初次參選區議會，黎麗霞已經係佢助選團核心，九一年劉江華拍住黃匡忠代表港同盟參選立法局落敗，之後就退出港同盟，黎麗霞透露，「劉江華約我食飯，話唔想受政黨限制所以退黨，點知轉頭就加入民建聯！」
黎麗霞話沙田唔少睇住劉江華出身嘅人，對佢今次落選「好高興」，因此佢自資千幾蚊為大家「贈興」，咁做會唔會有失風度？「我唔理得其他人點睇。」
傳真︰2623-9278
電郵︰