八個家庭，九個學生，到尖沙嘴「海×服務中心」報讀「美國文化大使交流計劃」，每人繳交五萬九至七萬九港元，為數不菲，但結果係學生流落異鄉，竟然去咗加勒比海小國伯利茲，誤入賊屋，真係劇情曲折離奇，匪夷所思。呢間「海×」離晒譜，搵年少學生嘅前途、生命較飛，以咁嘅手法嚟呃錢，真係要因住收尾幾年。
伯利茲大概冇乜人熟悉，八十年代中英談判開始後，唔少地方嚟香港賣護照，甚麼伯利茲嘅「代表」，就曾接觸過左丁山，所以知道佢喺邊度，好似當時有唔少人買咗，包括一位已故嘅紅歌星㖭。當時嘅賣點依稀記得係如持有伯利茲護照，可以免簽證入美國。
周校長睇完單新聞，憤憤不平，為學生家長唔抵。左丁山不以為然，因為咁拙劣嘅手法都可以搵飯食，即係話香港人頭腦簡單，見到「美國升學」四個字就瞌埋雙眼，自願跌落陷阱，雖然其情可憫，但智慧全無，可嘆可嘆。
諗番轉頭，左丁山話番周校長：「都係你哋啲教育界人士唔好，平時完全唔向中學生灌輸留學常識，令到佢哋矇過蒙正，好易墮入天仙局。」周校長大吐苦水：「我哋教書，逼會考成績已經做到儍。邊度有時間搞升學輔導，何況我同班老師都唔熟悉申請留學程序呢。」嚡，對周校長好同情，政府正在削減教育經費，學校驚緊超額教師（因為審計署計到絕，教師可能因此失業），邊度有學校肯去花時間搞升學輔導吖，希望有啲有錢兼有心嘅人士，以薄利甚至不牟利方法，辦番一間正正經經嘅留學輔導中心。