踏入十二月，城中好事多籮籮。即將榮升做新奶奶嘅新聞處前處長丘李賜恩話，可能因為年頭沙士肆虐，搞到好多人將婚期押後，所以堆晒喺年尾，聽講明年重多，要喺好日搵地方擺酒都唔容易。
咁都好，酒樓有生意做，大家心情都靚啲。丘太有一仔一女，個仔丘兆棋呢個月十七日會迎娶哈佛同學、做醫生嘅陳小姐，原來丘太個仔好威水，攞咗兩個哈佛碩士銜頭，一個係MBA，一個係Arts，𠵱家喺香港打緊銀行工，而個新抱Emily就係無國界醫生亞洲區主席。
講到個仔，丘太梗係好開心，佢話自己同丘生出年都退休，實行享吓仔福。
丘太辦喜事之前，有煲呔同梁劉柔芬搶閘，煲呔做醫生嘅大仔慶衍九號拉埋天窗，梁太個仔耀宇就十三號娶大生銀行嘅馬桂敏小姐，兩家都喺堅道天主教總堂行禮。八方早前見到梁太，佢蓮子蓉咁嘅樣，真係喜從中來；至於煲呔曾就下周一起放大假一周，做新老爺梗係高興啦，真係恭喜晒咁多位。
傳真︰2623-9278
電郵︰