爆機狂迷：<br>《GT4：Prologue》中文版真實賽道學揸車

爆機狂迷：
《GT4：Prologue》中文版真實賽道學揸車

萬眾期待嘅《GT4：Prologue》終於推出，作為PS2王牌賽車Game新作，製作隊伍梗唔可以馬虎了事，提升畫面質素外，重強調真實化演繹，由賽道到車輛表現，都務求貼近現實情況，令機迷投入感大增，作為《GT4》正式版嘅序章遊戲，算係交足晒功課。
記者：梁啟成

遊戲類型：賽車
對應機種：PS2
遊玩人數：1人
行貨售價：$198
開發商：SCEI

作為《GT4》嘅序章遊戲，收錄內容比預期重豐富，雖然並未有香港人引頸以待嘅尖沙嘴賽道，不過都收錄咗五大著名城市賽道，而且車種方面亦不少，最吸引係新嘅「School」學習模式，類似舊有嘅考牌玩法，不過題目及難題均超越舊作，極為襟玩。

五大賽道真實呈現
遊戲真實化乃GT之父山內一典一直努力做到嘅目標，遊戲內五條賽道均依照真實情形而設計，如紐約市街景，就十足十湯告魯斯嘅《魂離情外天》一幕咁真實，其他如意大利市鎮、大峽谷等賽道，背景像真度都非常之高，令機迷更有投入感。另一變更點，就係多項物理運算嘅更新，如賽道嘅泥地、沙石、草地等，都令人明顯感受到分別，另外觀眾變得生動（居然有人敢衝出跑道影相）、棍波車比自動波車更易煞車等，難怪現實中，有車廠將佢作內部訓練員工之用。
車種方面，光源表現仍是一貫出色，不過相較《GT3》及《GTConcept》分別並非太大，最過癮反而係連普通車都可跑越野賽道（Rally），面對飛沙走石嘅大峽谷，扭少少軚已經勁甩尾，又唔可以換Parts，真係少啲功夫都揸唔掂。

■意大利街道主要玩窄巷戰，好易碰到建築物而扣分。

■紐約市賽道比舊有嘅東京賽道更宏偉、更細緻。

■今集Rally車同街車可以調轉嚟跑，夠晒挑戰性。

■越野車及賽道有多項改良，如泥地、沙地、草地等，都令賽車表現有明顯分別。

序章出現香港賽道
講到《GT》系列最好玩地方，筆者首選「考牌模式」，不過到咗新嘅《GT4：Prologue》，就改為「School」（學習模式），基本玩法一樣，同樣以挑戰各種特定條件為目標，如高速煞車、通過複合彎等，成績好重可獲得金盃作獎賞，不但令玩家更為了解車種特性，考得好重可獲得不少勁車，如BMWMclarenF1、TAKATA童夢NSX等，總數超過60架車，夠晒襟玩。
學習模式主要分綠、橙、藍、紅四個等級，愈往後難度就愈高，若順利通過四關後，便會播放幕後製作特輯，當中更收錄咗香港賽道嘅製作情形，絕對值得欣賞，令人更為期待《GT4》正式版嘅推出。之後就正式進入考驗真正「食力」嘅紫級實戰篇，雖然暫時仍未知全部通過後有咩獎賞，不過已令人感到《GT4：Prologue》相當之抵玩。

■Ending播片內，會出現有車落場砌嘅尖沙嘴賽道，海旁景色靚到嚇死人。

■喺學習模式內，不但全中文顯示點過關，重有普通話教你竅訣㖭。

■完成頭四區課程後，紫區隱藏課程就會出現。

■遊戲重收錄唔少幕後嘅製作花絮。