劉鑾雄（大劉）和王穎妤之間的恩怨情仇，昨日的焦點放在大劉是否曾向王穎妤求婚上，大劉否認後，王穎妤和鄭裕彤昨日接受電台訪問，彤叔再次證實曾代求婚，大劉隨即召開記者會，指所謂求婚，目的是找出二億賠償的幕後黑手，就如警察放蛇，「是捉雞，不是叫雞」。
王穎妤日前先後接受電台及雜誌訪問，公開過往和城中富豪劉鑾雄的私生活，指自己五度拒絕大劉的求婚，以及退還求婚的數千萬珠寶，並曾為對方自殺。前日大劉由歐洲回港後召開記招，斬釘截鐵地否認曾向王穎妤求婚，並透露有人曾向自己索取二億賠償，以及王穎妤和自己拍拖時的揮霍生活，並踢爆對方從無供過現時的寓所。
昨日王穎妤再次接受商台《茶煲裏的查篤撑》的電話訪問，求大劉原諒她，同時富豪鄭裕彤亦接受訪問，力證自己曾受大劉所託向王穎妤求婚，彤叔說：「當其時阿劉生託我向阿王小姐求婚，係有咁嘅事，實際係有咁嘅事，不過最好唔好問咁多嘢啦，因為我唔想再牽涉在內。坦白講要做媒人……好似人講『唔做中，唔做保，唔做媒人三代好』。」
而王穎妤則說：「我過去呢兩年已經好努力咁去忘記以前嘅唔開心、去重新生活。我真係好想去重新生活，我今次出嚟接受訪問嘅目的，只係為咗幫我爸爸（王見秋）澄清外界對佢嘅睇法同批評，但係我估唔到會引起咁大嘅風波，我真係唔想再去提以前嘅感情故事。我求吓劉先生你原諒我，可能我真係唔識得去愛你。」
大劉得知王穎妤和彤叔的言論後，昨日下午三時半，再次在他位於灣仔的辦公室召開記者會，表示自己透過彤叔向王穎妤求婚，只是試探對方的底牌，情況就如警察放蛇。
（記者：記 劉鑾雄：劉)
記：王小姐話求你原諒？
劉：自從佢兩年幾前離開我，我從來冇怪過佢，就算有怪都係怪我自己，每個人都會做錯嘢或者蠢，要怪就怪自己做咗蠢事，所以談唔上原唔原諒。我亦知我俾人追殺緊，四圍放我啲料、做我世界，就算佢會唔會再公開講嘢，對佢嚟講，件事都唔會完。
記：你話冇向王小姐求婚，但彤叔又話你託佢做中間人？
劉：正常情況一個男人向女人求婚，唔需要透過第三者，我嘅目的係想揭佢底牌，件事嘅關鍵係二億銀賠償，佢嘅幕後主謀係邊個我唔肯講，王小姐口口聲聲話我對佢唔住，呢啲錢係賠償佢精神上嘅損失同痛苦，我就講過話錢唔好收，不如我哋結婚，呢番說話喺咁嘅情況之下先同彤哥講，但彤哥點同佢講我就唔知。我相信彤哥唔知幕後黑手係邊個。
根本件事係佢幕後老細叫佢嚟攞二億，因為個主謀曾經同我講『Joe哥，我覺得R小姐攞二億係應該，你點諗』，我就知佢係主謀，但又扮晒獨立第三者、扮和事佬。我有晒佢哋來往嘅證據，包括電話來往嘅紀錄，食過幾多次飯。如果爆個幕後老細出嚟，第一我得罪唔起，第二我哋始終認識一場。
記：但你都有託彤叔向佢求婚？
劉：我即係好似做卧底，警察放蛇，係捉雞，唔係叫雞。
記：個幕後黑手同彤叔有冇關？
劉：我唔講呢樣嘢，雖然我儍儍哋。
記：彤叔出嚟做訪問，係為咗維護某人？
劉：我唔識講，亦唔方便講。
記：覺唔覺彤叔處於兩難嘅局面？
劉：唔好再問呢啲問題啦。
記：你之前形容過呢個係變態遊戲？
劉：我嘅意思只係譬如兩個朋友，睇中另外一個嘅女友，唔好諗得咁複雜，大家都會有咁嘅事，只不過層次唔同，銀碼唔同。
採訪：張止寒
