政府為求滅赤無所不cut，其中社會福利署晨早就預警，要削減綜援同生果金等福利，𠵱家重可能連老人院舍都話要起少啲喎。
話說由好收成集團牽頭嘅土瓜灣木廠街重建項目，原先政府要佢哋喺項目商場部份，起番啲老人院舍，但發展商再徵詢社署時，官方話原本以為由發展商出埋錢起，點知唔係，咁社署咪決定唔要囉。
發展商覺得咁重好，人棄我取，將原先留作起老人院舍嘅樓面，全部改晒做商場，令個場面積去到成6.6萬方呎。原本老人院舍樓面大約有3.07萬方呎，如果以每個商舖100方呎計，都間到超過300個㗎，價值自然增加唔少啦！
好收成個項目會起3幢住宅，提供792個單位，住宅下面幾層平台就係住客會所、商場同停車場。
土瓜灣傲雲峰重推，用咗成億幫個會所增值，硬件準備好都要軟件配合，所以特別請咗啲國際級猛人，喺會所開班授徒。其中游泳班就請咗有前國家游泳隊代表楊洋做總教練嘅教育機構，主持泳術訓練班；陸上都唔弱，請嚟羽毛球壇名將──前中國青年羽毛球隊及前香港羽毛球隊隊員陳敏華親執教鞭，連教練都星光熠熠。
另外重有英語班、音樂課程等等，噚日邀請咗兩位英語班嘅學生即席表演，分別係4歲嘅Justin同5歲嘅Alice，年紀小小已經識唱英文歌，而且重有動作配合，相當精靈。蘭西記得，長實執行董事趙國雄都係叫Justin，唔知下次可唔可以同場演出呢？
聖誕節臨近，商場大業主各出奇謀吸引消費者，信和嘅小西灣藍灣廣場，就企圖打破健力士「史上最長綠色冷頸巾」紀錄，以求在眾多商場中突圍而出，參加者要每人織一條最少5吋乘5吋嘅綠色冷頸巾，駁埋一齊變成全球最長。
為咗要喚起市場注意，最好梗係搵明星幫手啦！佢哋今日就搵嚟藝人2R做慈善大使，親手織第一針。呢個活動由今日起至本月27號。今日市民去藍灣廣場除咗可以睇明星之外，重可以參加問答遊戲，贏取信和同西門子合作送出嘅美食禮券同家電產品。
另外，商場又搞收集文具用品活動，等內地山區嘅小朋友都可以分享普世歡騰的佳節溫情。
蘭西啱啱講完長實嘅長沙灣宇晴軒，喺地盤對出空地整咗個展銷處，隔籬嘅長沙灣昇悅居，無巧不成話都跟住整番個展銷中心，今日就開幕嘞，地點喺深水埗地鐵站裏面。
雖然呢個昇悅居展銷中心係由中原搞嘅，似乎唔關發展商新地事，但中原係樓盤獨家代理，咁唔多唔少都令人有啲聯想。個展銷中心暫時只係擺兩日，但有可能會加碼延期。
豪宅熱賣潮停不了，好似何文田君頤峰，就有個長駐內地嘅中港商人，豪氣地用咗成1400萬掃入兩伙，分別係7座1233方呎同6座1062方呎，平均呎價6100蚊。為隆重其事，中原地產香港區董事唐哥（唐秉正）今日重親自送合約去北京畀佢簽。
要出動到唐哥，唔通呢個買家來頭好勁？聽講，個買家喺香港有唔少投資物業，大部份係豪宅，𠵱家重考慮緊添食，想買多個君頤峰複式，咁大家明冇。
蘭西
電郵地址：
