馮仁昭四圍超：群星銅鑼灣唱K好熱鬧
Tiffany會型男遭撞破黑面走人

前晚銅鑼灣可謂星光熠熠，唔少明星分別去咗皇室堡加州紅同埋CEONeway唱K消遣，舒淇同張燊悅齊齊撇低黎明同雷頌德，凌晨喺CEONeway狂歡，佢兩個玩到將近四點至曲終人散，而李蘢怡（Tiffany）就同六呎型男結伴唱K，撞見記者重即時黑面離場。

路盲亂咁舂
Tiffany早排俾人影到佢同北京演員賈宗超約會，但前晚十點幾，Tiffany同另一位型男出現皇室堡時撞正成班記者，Tiffany十問九唔應就搭𨋢上咗加州紅，但過咗幾分鐘，Tiffany又落番嚟，佢重黑面問記者：「你哋邊間報館㗎？畀張卡片我！」之後兩個就決定唔唱K，一齊上的士離開。
此外，主演周星馳新片《功夫》嘅大陸女演員黃聖依、田雞（田啟文）同一班工作人員前晚亦約埋唱K，姍姍來遲嘅黃聖依就好似路盲咁喺皇室堡亂咁舂，要由記者帶路先知喺邊度搭𨋢，而蒙嘉慧亦都約咗朋友喺附近唱K。

肥姐攞獎眼濕濕
沈殿霞（肥姐）前晚憑《肥姐駕到》一劇喺台灣舉行嘅《亞洲電視大獎2003》奪得「最佳喜劇女演員」獎，拍戲拍咗四十三年嘅肥姐雖然已經攞過唔少獎，不過前晚咁啱係佢九十三歲嘅媽媽生日，肥姐開心到眼濕濕咁話會將個獎送畀佢媽媽，感激佢咁大年紀重要幫佢照顧欣宜，所以話母愛幾時都係最偉大嘅！

蕭亞軒變身特派記者
台灣歌手蕭亞軒日前幫電影《地下鐵》去美國錄音，佢順便幫台灣年代新聞電視台做特派記者，電視台利用衞星向全球報道聖誕資訊。學生時代嘅蕭亞軒曾憧憬做記者，但實際做起來又另作別論。佢用國語話：「我平時都是接受人訪問，但要做報道真的很不同，但我擔心會吃螺絲。」咁又係呀，話晒係向全球報道，衰咗都幾瘀㗎！

有線拍《怪談》現怪影
關寶慧同有線《怪談》節目工作人員去灣仔鬼屋探險，當攝製隊拍鬼屋樓上時，攝影師見部攝影機唔着以為冇電，於是換咗嚿新電上去，結果都係唔郁，但一返落樓下又着番；另外，有人喺樓上影咗張相，發現相中無端端多咗兩個影（圖六箭嘴示），究竟係真係假，咁就真係要大家自行判斷。