人人留力認購新股，大市交投靜晒，全日得91億元多啲，藍籌股多數牛牛皮皮，冇驚亦冇喜，相關窩輪亦冇乜突出表現。
不過，前度恒指股新世界（017）是日做番齣好戲，大升5.7%，由5.3元彈上5.6元收市，成交金額達2億銀，認真熱鬧。
正股升3毫，帶動新世界Call輪9297彈跳30%，成為是日輪王。9297明年6月初到期，1輪兌換1正股，溢價33.6%，槓桿率9.3倍，現價60仙，數據唔係咁靚。
9297最大問題係溢價偏高，不過冇辦法，想玩新世界Call輪，暫時只得佢1隻，冇得揀。正股現價重係大折讓，中長線仍可看好，但今個禮拜股價已大升1成半，短期可能要唞氣。9297溢價高，正股若牛皮幾日，揸輪好易輸溢價，所以想玩呢隻輪，都係等正股回番多少至諗，而且記住宜炒不宜揸。
中鋁（2600）係近期另1隻威水股，昨日再升近4%，收報4.675元。中鋁有4件Call輪，9020同9250係鎖定回報輪，一般散戶未必啱玩。9214同9253係標準輪，呢兩件溢價唔低（13.1%同10.6%），槓桿率唔大（得4.6倍同3.6倍），加上正股1周已升16%，𠵱家撲入去追輪，博唔過。
章盛