洪金寶同苗僑偉一班高球迷前日參加完歐米茄嘅比賽後，夜晚就去咗紅磡都會海逸酒店晚宴。洪金寶被問到早前原本做《功夫》動作指導，點知同周星馳有拗撬，終於搞到劈炮唔撈，提番呢件事，洪金寶重係幾火滾，佢話：「只怪我自己太好人，耳仔軟，當係『吃一次虧、學一次精』囉，我唔會怪任何人，總之唔鍾意呢個人咪見少啲囉，喺呢件事我梗話自己啱晒㗎，不過如果你問同呢個人重有冇合作機會呢？我可以答你一個字——『冇』！」
至於譚詠麟（阿倫）被指𠝹一名二十三歲後生女，會唔會覺得阿倫份人好花弗？洪金寶話：「花弗好吖，花弗心境都開朗啲。」苗僑偉前晚就大讚阿倫同曾志偉好波，佢話：「阿倫大大話話贏波嘅錢都有幾百萬啦，我哋成日笑佢呢幾年都冇用過提款卡。」
盧巧音（Candy）最近幫Budweiser啤酒拍了一輯聖誕廣告宣傳片，呢輯廣告好有聖誕氣氛，Candy話好希望觀眾睇完個廣告後，可以感受到普世歡騰嘅過節氣氛。Candy拍呢個廣告時，因為成日NG，都飲咗唔少啤酒，佢嘅酒量麻麻，不過佢覺得飲咗啤酒拍嘢HighHigh哋都幾過癮。不過醉咗唔好搞到EQ低鬧記者就得嘞！
方力申（Alex）噚日喺商台為節目《考股專家》錄廣播劇，原來Alex都係一名投資專家，佢由十八歲開始就玩股票，加上佢本身讀工商管理，所以就試過賺過六位數字。Alex如果真係咁有投資天份，點解走咗嚟唱歌呢？𠵱家咁多翻版，唱歌好難搵錢㗎！
張敬軒噚日到港台接受《娛樂滿天星》訪問，佢被指有一對桃花眼，張敬軒直認近排多咗女仔追求，原來佢嘅擇偶條件好高，張敬軒要求女朋友要識煮飯同執屋，重要似陳慧琳嘅外形，早前佢同2R嘅Rosanne傳緋聞，佢竟然嫌女方大過佢同唔夠高喎，認真奄尖。
張堅庭八十四歲嘅媽咪吳金葉，早排過咗身，噚日朝早十點喺紅磡萬國殯儀館出殯，阿庭幾個圈中朋友，包括鄒世龍兩公婆、岑建勳同謝寧兩公婆、鄭丹瑞，都有去到個喪禮，送張媽媽最後一程，喺個喪禮度阿庭都表現得好平靜。
