八方前日話有人想游說渣打董事王冬勝挑戰寶Baby選立法會個位，噚日已經有人「更正」，話唔係游說王冬勝，而係王生已經開始入緊閘！銀行界人士報料，王冬勝今次夠薑郁寶Baby，背後唔係北面嘅阿爺，更加唔係中銀意思，反而係班紅鬚綠眼外資銀行支持佢，聽聞包括獅子銀行在內，又有人話因為寶Baby唔聽話，成日同阿董過唔去，所以有人「動員」王冬勝挑戰李國寶喎。
咁王冬勝又有幾大贏面呢？有中環「評馬人」分析，王冬勝有紅鬚綠眼支持，班本地銀行家梗係唔想個立法會代表聽鬼佬支笛，但寶Baby咁鬼政治，同佢哋只問生意，不問政治想法唔多夾，最重要係阿爺又未表態，中銀合併後由以前十三票得番三票，𠵱家真係唔知揀邊個好，但有心水清銀行家話，王冬勝打份工，日後要同阿爺、政府開火，佢未必夠硬淨。
傳真︰2623-9278
電郵︰