英國女子組合AtomicKitten,早排應承嚟《維港巨星滙》順便到亞洲宣傳,最後因為成員Natasha病到七彩而甩底。不過Natasha休息咗個幾月,𠵱家鬼打都冇咁精神,前兩日重同埋Jenny同Liz去咗台灣宣傳新碟。
英國傳媒早前話Natasha瘦過碌竹,傳佢患上產後抑鬱症,今次Natasha喺台灣否認呢個傳聞,重話自己一啲病都冇。前日Natasha去西門町101表演時,重拉埋Jenny同Liz大爆自己嘅𠝹仔心得,話佢有病都冇人信。
Natasha話自己曾經錯愛,同Westlife個前保鑣FranCosgrave分手,但係佢𠵱家同AtomicKitten嘅舞蹈員GavinHatcher熱戀,而且重係主動搭訕追返嚟。而Jenny就表示同DJDomThrupp訂咗婚,佢話追男仔最緊要主動,兩年前佢喺酒吧見到未婚夫第一句已經同佢講:「我哋第時一定會結婚,我好鍾意你!」
講到佢哋三個之中,最怕羞嘅係Liz,佢話自從七個月前同Blue嘅LeeRyan分手,感情一直冇着落,因為佢由細到大都係等運到,難怪重係孤家寡人。