點解中國海外（688）近期股價走勢咁靚，唔通赤柱富豪海灣賣得好好？正當小初滿腹疑團之際，經紀黃就話，中國海外呢兩個星期有唔少大手成交上板，芬佬界傳出有個美資基金買咗唔少貨，所以隻股表現咁好。
中國海外在11月底，先有一宗6000萬股，造1.20元的大手成交，跟住前日又再有三手，計埋又係6000萬股，但就造1.26元，兩批股份加埋成1.2億股，睇怕都係有強者接貨。
不過，小初就有個疑問，話就話接貨者係芬佬，咁沽貨又係乜水呢？經紀黃話其實唔重要，皆因向來股市都有如玩音樂椅，有人起身時又有人坐低，最重要係有人肯要貨。
自從呢幾宗大手成交上板後，中國海外股價隨即開車，噚日升5.5%，收1.34元，創下52周新高，成交金額亦增至6422萬元。
另外，味丹國際（2317）雖有基金減持，噚日股價一度回落至1.58元，但收市抽番上1.64元，倒升0.6%。經紀黃話，情況同中國海外相近。
慕容小初